CLICK HERE FOR BLOGGER TEMPLATES AND MYSPACE LAYOUTS »

الخميس، 7 يناير، 2010

حاجة جديدة؟؟؟؟


ازيكوا ؟؟

وحشتووووني جدا...

يارب تكونوا بكل خير يااااااااااارب

العنوان يمكن غريب شوية بس انا كاتباه وانا حساااه اووي اووي لان فعلا الحياة اللي انا بعيشها مافيهاش اي جديد ويمكن انا بدور علي الحاجة الجديدة اللي اخليها موجودة في الحياة دي بس للأسف حاسة اني مش لاقية

المدونة دي اول ماعملتها كنت اسعد حد ف الدنيا كنت دايما بضحك واهزر ودمي خفيف وكنت حاسة اني لسة ادامي الحياة جميلة

بس للأسف السنتين اللي غبت عليكم فيهم حصلتلي حاجات كتير ماكنتش متوقعاها حاجات بجد زعلتني اوي

خسرت ناس كتير كانت قريبة مني حصلتلي مشاكل كتير اوي ومشاكل كانت بتحسسني اني نفسي اموت بقي وارتاح يمكن المدونة دي غير المدونة التانيه لان دي انا سمتها ايام حياتي عشان احكي فيها فعلا عن ايام حياتي اللي بمر بيها وقلتلكو انكو هتعرفوا عني كل حاجة من خلال المدونة دي لاني بجد بكتب فيها كل حاجة بمر بيها وكل حاجة بحسها..

اللي خلاني اكتب دلوقتي اني بجد مخنوقة جدا من حياتي دي حياة بجد مالهاش معني يعني دايما مخنوقة وبالي مشغول ومدايقة وزهقانه واحيانا بضحك بس قليل اوي

يعني حياتي ف 2007 اتغيرت كتير اوي ف 2008 و2009

وبجد2009 دي انا بكرهها لما صدقت انها خلصت كانت بجد سنة وحشه اوي حصلتلي فيها حاجات كتير اوي مش لذيذة يعني

انا مش عايزة اشغلكم معايا ولا احبطكم بس انا بحب اخرج اللي جوايا واحكي كده ..

سبكوا من كل دة المهم انتوا وحشتوني جدااا وعايزة اعرف اخباركم كلكم كنتوا عاملين ايه من غيري هههههههههههه

انا هقولكم اخباري

انا دلوقتي ف حقوق عين شمس وارتبطت بحد كويس جدااا بحبه اوووي اوووي

بس للأسف مش متفاهمين خااالص يعني الفتره الاخيره دي بقت بيننا مشاكل كتيره اووي مع اننا بنحب بعض جدا

وبقالنا تقريبا سنتين مرتبطين يعني مش مدة قليله

بس عارفين لما كل واحد يبقي فيه ضغوط وهموم بيبقي الاتنين علي اعصابهم ومافيش حد عارف يستحمل التاني هو تقريبا دة اللي انا بمر بيه

عشان كدة بقولكم مافيش جديد !!!!

مافيش جديد ف اي حاجة خاااااااااالص لا دراسه ولا صحاب ولا ايام ولا احداث ولا اي حاجة

دايما الحاجه لما بتكون بعيدة عننا بنقدرها ونبقي هنتجنن بيها لكن اول مانمسكها بايدينا بتقل قيمتها وبتروح تقريبا

مش عارفه ليه كدة بجد.

انا من رأيي ان المفروض الواحد لما يكون عايز حاجه وبيتمناها ويلاقيها المفروض انه يحافظ عليها ويتمسك بيها لانه ملقاهاش بسهولة

هو ده اللي مخليني بفكر كتير ف طبيعه الحياه الغريبه اللي احنا بنعيشها حياة مشقلبه بجد مفيهاش اي حاجة مظبوطة ربنا يصبرنا عليها بجد

ويصبرني انا اكتر واااااحدة والله

ويصبركم كلكم طبعا

انا بس حسيت اني عايزة افضفض واحكي وزي ماعودتوني انكم دايما تنصحوني وتدوني ارائكم الذهبية عايزاكم تدوني رأيكم ف الموضوع دة

وتطمنوني عن نفسكم وتقولولي اخر اخباركم ايه؟؟؟

يارب تكونوا بكل خير

اختكم شيتوس

الجمعة، 12 سبتمبر، 2008

خليها علي الله








بجد ياجماعة انا مش عارفة ابدأ منين ولا اتكلم في ايه ؟؟؟؟؟؟؟؟؟؟

بجد زي القرءان ماقال مهما اتكلمنا وعدينا نعم ربنا علينا عمرنا ماهنقدر نحصاها.

انا ربنا بيقف جمبي كتير اوي وفعلا الانسان لما بيكون قريب من ربنا بيكون مرتاح كدة ده شعور انا دايما بحس بيه .

رمضان ده انا حاسة فيه بإختلاف فظيع جدا لاني انا في فتره طوييييلة اوووي بعدت عن ربنا ونسيت الصلاة وبعد ماكنت حافظه قرءان نسيته بجد كنت بتأثر اووي وانا بصلي والاقي نفسي نسيت الأيات القرءانيه واقعد اقول لنفسي يعني مابعد ماكنتي بتجودي القراءان وحافظه منه بقدر كويس تنسيه كدة؟؟؟؟ بجد كان سؤال دايما يحاوطني ماكنش بيروح من دماغي.

حبيت اسمي العنوان (خليها علي الله)لإن فعلا لما بتتوكل علي الله في اي حاجه وفي كل حاجه صدقوني بتعدي بسلام وبأمان ومن غير اي مشاكل بمجرد دعوة وعمل صالح تلاقي كل حاجه اتفتحت ادامك وبقت متيسرة بذمتكوا في اسهل من كدة؟؟

كمان حبيت اسمي العنوان(خليها علي الله)لأن انا بجد بحب الأغنيه دي جدا اللي بتغنيها( اصاله) بتقول فيها

(بدوب في حبي لربنا ومحبته عبادة) فعلا ياجماعة محبة ربنا عبادة وانا والله بحب ربنا اوووي اووووي بجد ونفسي يكون راضي عني.

وكمان بتقول (ياللي انت اقرب لي مني عمرك ماكنت بعيد الكون دة كله يمكن وانت بس اللي اكيد)

لما تكون مخنوق مدايق قرفان زهقان طهقان فرحان مبسوط كل حاجه تلاقيه جمبك ومعاك تخيل لما يكون حد عارف اللي جواك

وعارف اللي هيحصلك من قبل مايحصل اكيد اقرب لك من نفسك بجد ســـــــــــبــــــــــحــــــــــان الــــــــلـــــه.

كمان كل حاجه فعلا في دنيتنا دي ممكنة لكن ربنا اكيد في كل حاجه بجد الكلمة دي بحبها ومعناها بيأثر فيا اووووووي.

انا كل اللي خايفه منه حاجه واحدة اني بعد رمضان المدرسه هتيجي والدروس خايفه اتشغل عن الصلاة وقراءة القرءان لأن انا بجد

حابة الجو النظيف دة اوي يعني انا الحمدلله قربت اختم القرءان وربنا يسهل بقي.

عايزين ياجماعة نخرج من رمضان مكفرين عن كل حاجه حصلت مننا زعلت ربنا .

اكتر حاجه بتزعلني لما يكون ربنا مدينا حاجه واحنا كمان مش بنشكره عليها او بمعني اصح مش بنستغلها في مكانها.

كمان ربنا بيستر وبيسامح مرة واتنين و10 مش معني كدة اننا نسوق فيها وكل واحد يقول انا هبقي استغفر.

مستكتر علي ربك اللي خلقك 5 دقائق والله هما فعلا 5 دقائق تصليله وتشكره علي نعمه اللي مهما عديتها مش هتعرف تحصاها.

انا كنت في مرة بتفرج علي فيلم( اوقات فراغ) في مشهدين اثروا فيا جدا .

اول مشهد:لما الولد الشاب مات وهو وسط صحابه يعني ياجماعة لازم نلحق نفسنا هتيجي في يوم مماتك تفتكر كل الناس اللي ظلمتها وكل حاجه وحشه عملتها وهتقول ياريتني بس ارجع 5 دقايق اصلح اي حاجه من الحاجات دي عشان ربنا يسامحني وصدقني ساعتها مش هينفع طيب وعلي كل ده مانت في ايدك من دلوقتي .

تاني مشهد:لما الشباب خافوا من الموت وابتدوا يصلوا وراحو يسمعوا خطبة من الشيخ في الجامع بجد الشيخ ده قالهم كلمة اثرت فيا

اووووووي

عارفين قالهم ايه؟؟؟

لو رئيس الجمهورية طلب منك انك تقابله 5 مرات في اليوم وفي المعاد كذا هتروح ولا لاء؟؟؟؟؟؟؟؟؟

واحد منهم قال اه هروح.......

الشيخ قال له:مابالك ربك اللي خلقك بيناديلك 5 مرات في اليوم وانت مش عايز تقابله ؟؟؟؟

بجد احنا ناس عايزين نصلح نفوسنا ومن جوانا ومافيش انسان بيتغير الا لو هو فعلا ناوي يتغير..

صدقني الدين يسر مش عسر

واي واحد هيقرا الكلام دة لازم يتغير بجد ماحدش بيقوي الا بربنا وهو معاااااه..

مهما ضعفت او قويت هو معاك، مهما فرحت او بكيت برده هو معاك، مهما سعدت او شقيت صدقني معاااااااااااك

ياريت ياجماعة بجد نتغير نتغير نتغير.


احساسي بيقولي اني لغبطت شوية في الكلام صح؟؟؟بس صدقوني انا مش عارفه اتكلم فعلا في ايه ولا ايه كل اللي عاوزة اوصله لكم اننا كلنا نسااااااعد بعض عشان نتغير ونقرب من ربنا وتبقي نفوسنا قويه وياريت ياجماعه تتابعوا الأستاذ عمرو خالد بييجي علي قناة الرسالة كل يوم الساعة 10 مساء بيفصل ايات القرءان ودي هتبقي سهلة عشان تختموا المصحف ان شاء الله في شهر رمضان وربنا يوفقنا كلنا ان شاء الله.

الثلاثاء، 9 سبتمبر، 2008

(((بيني وبينها)))

انا:ازيك؟
المدونة:الحمدلله.
انا:عارفة انك زعلانة مني .
المدونة:ليه يعني هزعل ليه؟
انا:طيب انتي ليه متعصبة كدة بس.
المدونة :اهئ اهئ اهئ ولا حاجة ولا اي حاجة.
انا:بصي انا عارفه انتي زعلانة من ايه بس انا لما قلتلك كدة اكتشفت انه حاجة خطيرة اوي.
المدونة:تقصدي ايه بالضبط.
انا:يعني لما سميتك ايام حياتي عشان اكتب فيكي كل يوم واحكي معاكي وكدة وانتي كل يوم تستنيني وانا مش بكتب صح؟
المدونة:بصراحة ؟ اه هو دة اللي مزعلني.
انا:طيب انا اعمل ايه قوليلي ايامي كلها شبه بعضها .
المدونة:يعني ايه يعني ؟
انا:يعني مش معقول كل يوم هكتب فيكي نفس الكلام ونفس الأحداث.
المدونة:لا وقال ايه بتقولي للناس انك هتحكيلي كل اسرارك ههههههههههه.
انا:اهااااااااا قولي كدة بقي ده انتي عايزة تتحشري كمان جوايا وتعرفي اسراري.
المدونة:اهئ اهئ اهئ
انا:ايه ياختي بتعيطي ليه ان شاء الله؟؟؟
المدونة:يعني انتي زابلاني وكمان بتتهميني اني عايزة اتحشر جواكي واعرف اسرارك.
انا:لا انا نقصدتش كدة عموما ياستي ماتزعليش ده احنا حتي في رمضان ولا انتي مش بتصومي ولا ايه نظامك.
المدونة: ان ان انننننننن ليه بس الإحراج دة يعني ماهو ممكن حد يدخل عندي ويغلط ولا حاجه وانا اللي افقد الصيام.
انا:لالالا ياختي انا صحابي كويسين لما بيدخلوا يتكلموا بيتكلموا بالأدب ولا انتي لما بتصدقي.
المدونة :اهئ اهئ تاني برده بتغلطي فيا انا مش عارفة انتي شادة عليا ليه في الكلام كدة مع اني مش كلمتك ولا عملتلك حاجه.
انا:لالالالالا انا ماقدرش اوعي تزعلي مني ده انتي صديقه غاليه اوي عليا ومقدرش ازعلك بس انتي بتستفزيني يعني انا بكتبلك عشان اصالحك وانتي بتستفزيني.
المدونة:خلاص هنتصالح بس علي شرط.
انا:شرط ايه ياختي هتشرطي كمان.
المدونه:اه هشرط بس.
انا:اتفضلي ياستي.
المدونة:انتي عارفه اني لسه جديدة ووحيدة يعني ابقي اسألي عليا كل يومين كدة وقوليلي اخبارك.
انا:بس كدة ؟؟ده انتي تؤمري.
المدونة:ماشي متشكره وكل سنه وانتي طيبة.
انا:وانتي طيبه ياستي.
المدونة:هستناكي بقي ها؟
انا:حااااضر من عنيا يلا اشوفك علي خير مع السلامة.
المدونه :مع السلامة.
معلش ياجماعه الحواريمكن طويل شوية بس سامحوني كنت بدردش انا ومدونتي شويه بس شفتوا دي طلعت شايلة مني اوووووي
ههههههههههههههههه لالالالالا انا مقدرش ازعلها خاااالص وعلي رأيها هحشرها جوايا وربنا يستر بقي!!!!

الأحد، 7 سبتمبر، 2008

يخربيت ام كده!!!!

الكلمه دي علي طول بقولها بجد هههههههههه
في اي وقت سواء فرحانه او زعلانه بس انا لما قولتها الايام دي قولتها وانا فرحانة
يعني فرحانه نص نص مش اوي يعني
المهم اللي عايزة احكيلكوا عليه دلوقتي ايامي انا وصاحبتي الانتيم
بجد احلي ايام معاها
بس قبل النتيجة ها؟
يعني كنا علي طول نضحك وكل واحد فينا يستغل المواهب اللي عنده يعني كنا مثلا ممكن نقلد مدرس بتاع
انتوا عارفين انا مره المسيو بتاعي بتاع الفرنساوي كنا ف المراجعه وجالو تليفون ولما رد قال
الوو بطريقة غريبه اوي فانا قلدته وهو سمع وكان يوم مسخره ههههههههههههههههه
والله بجد كان موقف فظيع بس عدا الحمدلله يعني بجد كانت ايام جميله
يمكن بقي لما النتيجة طلعت كل واحدة فينا اتأثرت شويه لإن الحمدلله يعني مافيش واحدة فينا حققت اللي كانت عايزاه
لإن احنا فعلا استهترنا وثقتنا الزايده في قدراتنا هي اللي رجعتنا ورا بس الحمدلله اتعلمنا
هي كانت عندي امبارح بتفطر معايا وكدة وبجد قعدنا نفتكر كل حاجه وضحكت ضحك امبارح وفي الاخر قولتلها يابنتي اسكتي
بكرة الأحد
طبعا هتستغربوا يعني ايه بكره الأحد هفهمكوا
اصل انا وهي كان بيبقي عندنا درس الفرينش كل يوم سبت وكنا بنقعد نضحك كتير اوي
ونيجي يوم الأحد تحصل اي حاجه تخلينا نتدايق او مشكله او كدة
فأتشائمنا من يوم الأحد ده
ده غير بقي ان كل الناس اللي ميته في عائلتي ميتين يوم الأحد
فبصراحة يعني يوم خربان اوي معايا يعني
ههههههههههههههه
بس المهم ان الحمدلله انهارده محصلش حاجه
الحمدلله الحمدلله الحمدلله
لا بس تصدقوا حصل
اصل انا كنت المفروض انزل انا وماما نخرج شويه
وماخرجناش وانا اتدايقت واتخنقت
ههههههههههههههههه
ايه دة يعني حصل تصدقوا يلا مش مشكله بقي بس عادي مازعلتش اوي برده
المهم عشان ماطولش عليكم انا لحد دلوقتي الحمدلله فرحانة شويه
يعني اختي قربت تولد وهيبقي عندنا نونه هييييييييييه
وثانيا ان العيد قرب وصلاة العيد اللي انا بحبها اوي
وثالثا لإني الحمدلله قربت من ربنا وبحاول اختم القرءان علي نهايه شهر رمضان ان شاء الله وربنا يسهل
ماتستعجلوش الايام اللي من النوعيه التانيه جاااااايه بإن الله
لا تقلقوا
اكيد اكيد اكيد هتيجي وبرده اكيد هقولكم عليها برده
يارب ماكونش طولت عليكم ويارب تكون كتاباتي خفيفه عليكوا
كل سنة وانتوا طيبييييييييين

السبت، 6 سبتمبر، 2008

أيام حياتي ياسلااااااام...

اهلا بأي حد هيدخل يقرا كلامي دة لو حد دخل يعني اساسا ههههههههههههههههههه
سؤال انا نفسي عماله اسأله جوايا انا ليه عملت المدونة دي مع ان انا عارفة انها بتبقي حاجة رخمه جداااا لما الواحد يكون عنده مدونتين
يعني مش هيعرف يعدل مابينهم او بمعني اصح هيحتار يكتب الموضوع في دي ولا دي
او برده طب لو كتبت ده هنا اكتب ايه هناك وكدة
بس انا عملت المدونة دي لهدف معين يعني هعملها زي مذكره كدة اكتب فيها كل اللي بمر بيه وكل اللي بيعدي عليا خلال ايامي .
ايااااااااام حياتي
هما مش كتير وبرده مش قليلين
يعني 16 او 17 سنة مش كتير ومش قليلين اوي برده
عشت منهم الحلو اووووووي وعشت منهم الوحش اووووي يعني 16 سنة بس والله شفت كل حاجة لحد ماحسيت اني خلاص عجزت وبقي عندي 100 سنة بس كويس كل ده بيعلم عشان الواحد مايبقاش اهبل هههههههههههه.
يمكن انا في مدونتي التانيه كله عادي بكتب اي حاجه بحبها او بتدايقني انا هنا يعتبر هصرح بكل اسراري هههههههه
يعني هقول كل حاجه لأني بجد عايزة احكي او اتكلم حتي لو كان كتابه لحاجه مش هتفهمني بس هتفيدني ان انا اعبر عن اللي جوايا
ودي بقي مش انسان عشان يزعل من كلمة او يفهم غلط(المدونة يعني)
بجد ياجماعه بقت حاجه تخنق اوي كل ماتيجي تتكلم مع حد الأيام دي يفهم علي مزاجه ويقول برده اللي علي مزاجه
والمفروض انك انت ايه؟
واحد مش بيحس مثلا او مش بيفهم عشان تزعل من مجرد كلمه.
انا بعترف ان انا يمكن بزعل من أقل حاجه بس مش بزعل من اي حد
يعني لو حد مايهمنيش هزعل ليه او هدايق نفسي ليه مايولع وحقي اعرف اخده ومن غير ماتخنق ولا ادايق نفسي عااااااادي يعني
المهم ان انا دلوقتي مخنوقه جدا لان حصل معايا موضوع كدة من حوالي 3 ساعات تقريبا مخليني مش طايقة نفسي مش عشان حاجة والله
بس مش بحب حد يفهمني غلط لا وايه ياريته غلط كان ممكن يتصلح
ده الفهم اللي هو من النوع( عبي يامخي وترجملي )ههههههههههههه
يعني الفهم المزاجي ده عارفينه؟؟؟؟
اكيد قابلتوا ناس كدة كتير بجد ربنا يصبر كل واحد فينا علي اي حد يعرفه من النوعيه دي عشان الواحد قرف والله وبقت الحياه لا تطاق
بس بالرغم من كدة هنعيشها علي رأيك ياعمر ايام وبنعيشها بجد عنده حق في كل كلمه قالها في الاغنيه دي ..
مش عايزة اطول عليكم وان شاء الله هبقي اتكلم عن الموضوع دة تاني ويارب المدونة الجديده تكون عجبتكم هي لسه محتاجه شويه تظبيط معلش بقي!!!